Ingresa o teu e-mail e recibe de xeito automático todas as novas que imos subindo.

mércores, 31 de outubro de 2012

O ALCALDE DE FENE RETIRA DA ORDE DO DÍA A SUBIDA DE TAXAS E IMPOSTOS DEBIDO Á FALLA DE APOIOS NO PLENO

A anunciada negativa do BNG de apoiar a subida da taxa da recollida do lixo e do imposto de rodaxe de vehículos foi a tese maioritaria do pleno do concello de Fene celebrado este pasado martes. O resto da oposición tamén se opuxo á subida, polo que o alcalde popular Gumersindo Galego, retirou o asunto da orde do día impedindo que se votasen ambos asuntos. Para o BNG é sorprendente que logo de convocar un Pleno sen ter feito o traballo previo de estudo das ordenanzas fiscais  chegado o punto da orde do día sexan retirados os asuntos para non sufrir unha derrota e quedar de manifesto a falla de competencia do goberno local.
O Alcalde actúa demagóxicamente cando “vendeu” a conxelación de taxas e impostos para este ano e todos podemos ver os recibos da contribución que teñen subas do 9% que implican entre 20 € dun piso de 40 anos en San Valentín e os 50 € dunha vivenda unifamiliar de 10 anos. Para o BNG este é o momento da sensibilidade de cara as persoas desempregadas, xubiladas que lle conxelan as pensións e  taballadores que ven reducidos os seus salarios, polo que as medidas deberían ir na liña contraria á da subida a discreción e que para o BNG pasaría por unha política fiscal progresiva e redistributiva.
Ademais deste asunto o concelleiro de facenda elevou ao pleno dúas propostas máis como foi a derogación da ordenanza forestal e a declaración de indisponibilidade dos cartos procedentes da paga de Nadal do persoal do Concello. As dúas propostas foron rexeitadas polo conxunto da oposición. No asunto da ordenanza forestal pedimos desde o BNG que se elaborara unha nova proposta antes de derogar a existente. No tema da declaración de non dispoñibilidade do diñeiro  destinado á paga de Nadal, os nacionalista opuxémonos a esta medida e reclamamos o cumprimento do acordo plenario no que se aprobou a compensación da paga de nadal.  O  PP foi incapaz de explicar os motivos desta proposta que non xeran beneficio algún nin para os veciños nin para o persoal municipal. Para o portavoz nacionalista, Manuel Polo "detrás desta medida  ocúltase a intención de engordar ás aseguradoras a través dos plans de pensións xerando liquidez no sistema financieiro á conta do persoal ao servizo da administración".


luns, 29 de outubro de 2012

A SUBIDA DE TAXAS E IMPOSTOS DO PP EN FENE CONTARÁ COA OPOSICIÓN DO BNG

O alcalde popular de Fene, Gumersindo Galego, ten convocado un pleno extraordinario para mañá martes as 8:30 no que, entre outros asuntos, tratará a subida do 3,4% do Imposto de vehículos de tracción mecánica, máis coñecido como a rodaxe. Tamén recolle a proposta de subir o 3,4% a taxa da recollida do lixo. Para o BNG de Fene non ten xustificación algunha esta subida de taxas cando non existe un traballo previo de valoración dos ingresos do Concello. O PP xa subiu a recollida de lixo e conxelou o resto de taxas e impostos para uns meses máis tarde subir a contribución urbana no entorno dun 10%. O BNG demandou en reiteradas ocasións un tratamento global das taxas e impostos acompañada dunha política de exencións e bonificacións en función dos ingresos. As previsións económicas para o 2013 son peores que as actuais polo cal o Concello debería prever as dificultades polas que vai pasar moitos veciños para facerse cargo das taxas e impostos. O portavoz nacionalista Manuel Polo afirmou que "as propostas deste tipo non poden contar co apoio do BNG polo que votaremos NON no Pleno a esta subida de impostos"



venres, 19 de outubro de 2012

Acto da fin de campaña comarcal en Perlío

Hoxe venres a partires das 21:30 celebramos o acto comarcal de fin da campaña na Praza da Escola de Perlío (diante da A.VV de Perlío) coas intervencións dos candidatos comarcais ao Parlamento: Fernando Branco, Manuel Polo e Mercedes Tobío, actuacións musicais e Magosto popular. 

Grazas a tod@s @s que nos botástes unha man nesta campaña!